تأملات عابرة قد تبضن بوب

أتبضن يا أبراهيم شوية معايا معلش. شهادة نهى الزيني ما جبتش حاجة جديدة كل الحكاية انها كانت توثيق للي كلنا عارفينه. بس ده كتير. 8 قتلى في دمياط و500 مصاب. ده في دمياط مش في العراق! عمرو نبيل فاكره يا أبراهيم؟ مصور الأيه بي الي كان بيشتغل معايا زمان أيام المجلة فقد عينه في "الأحداث". صلاح صديقي الدمياطي لما كلمته أطمن عليه قلتله أزيك؟ أزيك عادية من الي بنقولها لبعض كل يوم. عرف رد عليا قال لي أيه؟ "عمر الشقي بقي" ده رد واحد لسا مخلص شغل في حملة أنتخابية مش راجع من الجبهة! في دمياط قضاة اللجان الفرعية أعلنوا نتيجة لجانهم لقاضي اللجنة المركزية الي أعلن نتيجة مغايرة. القضاة رجعو اللجنة وعزلوا القاضي وطردوه من اللجنة قام القاضي كلم أمن الدولة أو مدير الأمن مش عارفة ومدير الأمن قطع النور عن دمياط كلها. واضح انه في خط أحمر لعدد المقاعد الي مسموح للأخوان الحصول عليها في البرلمان ولما بان انهم حيتجاوزه العدد ده كان لازم يحصل حسم عنيف من الدولة أو من الحزب الوطني مش فارقة كتير ماهو أساسا مفيش دولة بالمعنى المفهوم. في موقع الوعي المصري في صورة لظابط شايل سنجة!! أعضاء نادي القضاة طالبوا بتدخل الجيش لحمايتها لأن البوليس أما عاجز او رافض لحمايتهم. الناس الي نزلوا انتخبوا الأخوان كتير منهم ما شافوش أي خدمة من الخدمات الأساسية زي الصحة او التعليم غير في مستوصفات الأخوان او في المدارس الأزهرية. ما نقدرش نيجي نلومهم دلوقتي أنهم أختاروا أختيار رجعي وغبي. احنا كنا فين علشان يختاروا أختيار غير ده. وما تنساش كمان انه الأخوان يملكوا اسهل شعار في العالم. الأسلام هو الحل. قول لأ بقى يا كافر!!