ونحن نحب الحياة اذا ما أستطعنا أليها سبيلا

سعيدة رغم كل شيء. فرحانة من غير سبب أو يمكن بسبب مش مهم

أمبارح أستلفت سكيت بورد من عيل في النادي وقعدت أجري عليه وأقع بس مش مهم

والنهاردة لعبت بمكنة الفليبرز زي وانا صغيرة وصرفت فيها فلوس كتير بس برضه مش مهم

من لحظات كنت برقص لوحدي على غنا فرقة وسط البلد وهما بيقولوا "أه يا لاللي عالي اتغرب راح ولا قال لي" ".. أيه؟ الأغنية حزينة؟ بس رقصتني وهو ده المهم

النهاردة وانا داخلة النادي كان في بنت شبهي وانا في عمرها بتلعب باسكيت مع ولد شبه ولاد كتير كانوا أصحابي وانا في عمرهم. البنت والولد بيتبادلوا تصويب الكرة على السلة. كنت بعمل زيهم ويمكن أجيب كرة قريب وارجع أعمل زيهم؟.. لوحدي؟ اه لوحدي أيه المشكلة. مش حستنى حد خلاص علشان أفرح أو أعيش

في مشاريع وفي أحلام وفي فيلم أكيد حيتعمل وفي طفل صغير بيحبني قوي على ما أظن كنت بشيله فوق راسي أمبارح وهو متشعلق من أيديه في العقلة

في بحر في أسكندرية وفي بيتي في القاهرة وفي أصحاب شوية من الوقت

في قهوة ومتى وبيرة ونبيت

وفي كالاماري وبساريا وكريم كراميل

في أفلام في السينما وفي الشو تايم وفي المراكز الثقافية وفي بيوت الأصحاب

في مزيكا لوي أرمسترونج ومرسيديس سوسا وبيلي هوليداي والبيتلز وبوسا نوفا والسكوربيونز ومنير وفيروز ووجيه عزيز

في قلب معصور من ألم على كل الحاجات الي ما فضلتش زي ما هي وكل الأحلام الي ماتت بالسكتة وفرحان انه لسا حر وانه لسا بيعرف يرجع يحلم وانه بيستنى حاجات ببساطة منظر النيل وهو بيصب في البحر بترقب طفل

انه مستني سهرة بيتمشى فيها في شوارع أسكندرية كأنها أجازة في باريس

في كام حد ممكن يقرا ده ويقول أحنا عارفين انت موجوعة قد أيه وانك في الحقيقة بتكتبي ده وانت تقريبا بتعيطي. مش مهم

المهم انه في وسط احساس بالألم مش راضي يروح بعرف أفرح. واني لسا أبسط الحاجات بتجيب على بالي البيت ده

*ونحن نحب الحياة اذا ما أستطعنا اليها سبيلا

البيت من قصيدة لمحمود درويش*