أول الشتا تاني

بدأ الشتاء بالنسبة لي. لازال الجو حارا ولا زال العساكر يرتدون ملابس الصيف البيضاء ولكن للشتاء عندي علامات شديدة الخصوصية. البلح الرملي عند باعة الفاكهة,صوت طابور الصباح في المدرسة المجاورة لمنزلي أو حتى صوت أو ضوء معين يُلمح لي في لحظة ان الشتاء بالدفء الداخلي الذي يمنحه لي قد جاء. كنت قد سجلت لحظة مماثلة في العام الماضي في أيميل لصديق واعيد نشره هنا مع تعديلات طفيفة


هلا .....
كان بدي أفضفضلك متل ما حكينا أمبارح بس بعد ما سكرت معك حسيت حالي هلكانة فعلا وفتت نمت فورا. لما فقت اليوم كان لازم أنزل أبكر من كل اليوم لأنه جو المكتب كتير قمعي برمضان وكان لازم أفتش على محل قريب على مكتبي أشرب فيه قهوة قبل الشغل. كان بعده قلبي تقيل كتير وحاسة أن القشرة الي عملتها حولين حالي من القوة المصتنعة على تكة وتنكسر.المهم رحت قهوة بحبها قدام جامعتي وطلع أنهم عملوا طابق تاني فيه فرندا. تخيل أنت شو حلو أنك تشرب قهوتك الصبح على فرندا بطل على مبنى بديع وخضار كتير وشمس أول الشتا معطية كل ورقة شجر لون غير التاني والشارع شوي مغيم فالصورة قدامك ناعمة جدا كأنها فيلم أيطالي ولوي أرمسترونج عم بيغنيلك لحالك. كنت عم بقرا قصص قصيرة لشتاينك بس حتى قسوة شتاينبك شفتها شاعرية اليوم. وبس! شكلها هيك أتصلحت قشرتي لليوم ورجعت السلحفا تمشي بثقة. طبعا بما أني لبست الصبح قبل كل هذا فأنا لابسة جينز وتي شيرت وصندل مما يعني أني راح أكلها بهدلة من أمي لأننا اليوم عندها على الفطور ومعنا طبعا كل العائلة الكريمة الي بيزهقوني جدا جدا. وكمااااااان هذا, شمس أول الشتا راح تخليني أتحمله اليوم
يسعد صباحك